Екі күнге созылған кәсіби алаңға Қазақстан, Қытай, Қырғызстан және Өзбекстаннан келген 300-ге жуық жас педагог қатысты. Коннект бағдарламасы STEM-білім беруді дамытуға, жасанды интеллект мүмкіндіктерін тиімді пайдалануға және инновациялық педагогикалық тәжірибелерді білім беру үдерісіне енгізуге бағытталды.
Коннект жұмысына қатысқан Қазақстан Республикасының Оқу-ағарту министрі Жұлдыз Сүлейменова мен «Назарбаев Зияткерлік мектептері» дербес білім беру ұйымының Басқарма төрағасы Әнуар Жанғозин білім беру саласының өзекті бағыттары мен басымдықтарына, сондай-ақ инновациялық технологиялар кезеңіндегі ұстаздың рөліне тоқталды.
Шара аясында TED форматындағы дәрістер ұйымдастырылып, білім берудегі инновациялар экожүйесін дамыту, жасанды интеллект мүмкіндіктері, венчурлік ойлау мәдениеті және қазақстандық білім беру жүйесін цифрландыру тәжірибесі талқыланды. Қатысушылар алдында инновациялар және жасанды интеллект саласындағы сарапшы, кәсіпкер Давид Туғанов, венчурлік инвестор Бахт Ниязов және Орталық Азияның «Жылдың IT-педагогі», Forbes-тің «30 жасқа дейінгі 30» тізіміне енген Рүстем Ермеков сөз сөйледі.
Коннектің екінші күнінде Қытайдағы Shaanxi Normal University білім беру технологиялары профессоры, доктор Hongliang Ma жасанды интеллект құзыреттерін дамыту тақырыбында баяндама жасады.
Сонымен қатар NIS Педагогикалық шеберлік орталығының білім беруде жаңа мүмкіндіктер ашатын жасанды интеллектке негізделген шешімдері таныстырылды. Олар педагогтердің кәсіби дамуын қолдауға, сабақ дайындау үдерісін жеңілдетуге және білім беру үдерісін цифрландыруға бағытталған.
Коннект бағдарламасы NIS мұғалімдерінің шеберлік сабақтарын, практикалық тапсырмаларды, командалық квесттерді және инновациялық жобалардың таныстырылымдарын қамтыды. Қатысушылар алған білімдерін тәжірибеде қолданып, білім берудегі жаңа тәсілдер мен технологияларды талқылады.
– Бүгінгі коннект – ұстаздық еңбек жолымдағы алғашқы кәсіби іс-шара. Мұнда кәсіби нетворкинг орнатып, тәжірибелі әріптестермен пікір алмастым. Шеберлік сабақтары барысында магистрлік диссертациямның тақырыбына қатысты жаңа идея алдым. Бұл мен үшін өте құнды тәжірибе болды, – дейді Ақмола облысынан келген жас педагог Милана Сайлаубаева.
«Жас ұстаз: табысқа апарар жол» жобасы 2022 жылы еңбек жолын жаңадан бастаған жас педагогтердің кәсіби дамуы мен бейімделуіне қолдау көрсету мақсатында бастау алған. Осы уақытқа дейін жоба аясында ұйымдастырылған республикалық форумдарға 1000-нан астам жас мұғалім, ал өңірлік форумдарға 20 мыңға жуық педагог қатысты.
Биылғы «STEM. AI. Innovation» халықаралық коннекті жас педагогтерге заманауи технологияларды білім беру тәжірибесіне енгізуге, жаңа идеялармен бөлісуге және халықаралық кәсіби байланыстар орнатуға мүмкіндік беретін бірегей кәсіби алаң болды.
