Ашылу салтанатында ҚР Оқу-ағарту министрі Жұлдыз Сүлейменова білім беру жүйесін дамытудың негізгі басым бағыттарын атап өтті.
– Заманауи білім беру – тек біліммен шектелмейді, ол әлеуметтік және эмоционалдық дағдыларды дамытуды, ұлттық құндылықтарды нығайтуды, сыни және креативті ойлауды қалыптастыруды қамтиды. Біздің міндетіміз – еңбек нарығындағы өзгерістерге бейімделе алатын және өмір бойы білім алуға дайын ұрпақ тәрбиелеу, – деді министр.
Интенсив барысында қатысушылар пленарлық отырыстар мен педагогикалық сессияларда, сондай-ақ практикалық бағыттағы тректерде тәжірибе алмасты. Негізгі назар цифрлық технологиялар мен жасанды интеллектіні қолдануға, жобалық және командалық жұмысты дамытуға, оқушылардың зерттеушілік дағдыларын қалыптастыруға аударылды. Мұғалімдер өздерінің үздік STEM-тәжірибелері мен кәсіби қызметтеріндегі нақты кейстерін ұсынды.
NIS Басқарма Төрағасының орынбасары Жанбота Кабдыкаримова STEM-жобаларға қатысу оқушыларға болашақ кәсіби бағытын саналы түрде айқындауға және мектептің орналасқан жеріне қарамастан өмірлік міндеттерді тиімді шешуге мүмкіндік беретінін жеткізді. Оның айтуынша, ең бастысы – мұғалімнің дамуға деген ішкі энергиясы мен ұмтылысы.
– STEM үш негізгі міндетті шешеді: пәндер арасындағы ықпалдастықты қамтамасыз етеді, оқытуды нақты өмірлік жағдайларға бағыттайды және оқушылардың soft skills дағдыларын дамытады, – деп атап өтті Жанбота Кабдыкаримова.
Қазіргі таңда ауыл мектептері заманауи инфрақұрылыммен, оның ішінде STEM-кабинеттермен жабдықталуда. Бұл оқу процесін тиімді ұйымдастыруға жаңа мүмкіндіктер ашып, педагогтерге әдістемелік қолдаудың маңызын арттыра түседі. Жоба аясында NIS Педагогикалық шеберлік орталығы STEM-тәсілге негізделген білім беру мазмұнын әзірлеу бойынша кешенді жұмыс жүргізіп келеді.
Сонымен қатар жоба қатысушылары халықаралық білім беру бастамаларына белсенді қатысуда. Ауылдық тірек мектептердің мұғалімдері NIS Педагогикалық шеберлік орталығының тренерлерімен бірге Қытайдың Сиань қаласында STEM-білім беруді енгізу мәселелері бойынша тәжірибе алмасты.
– Сиань қаласында біз STEM-білім берудің стратегиялық және практикалық аспектілерін зерделедік. Бұл тәжірибе білім беру жобаларын әзірлеу мен іске асыруда жаңа мүмкіндіктерге жол ашты, — деді Шығыс Қазақстан облысындағы Сейтқамза Ластаев атындағы орта мектептің мұғалімі Амина Зарепкан.
Интенсивтің қорытынды кезеңінде оқушылардың жобалары таныстырылды. Оқушылар STEM бағыты бойынша өз әзірлемелерін ұсынып, алған білімдерін практикада қолдана алатынын көрсетті.
Айта кетейік, аталған интенсив «Ауылдық жерлердегі тірек мектептердің әлеуетін дамыту» жобасы аясында өтті. Жоба «Қазақстан халқына» қоғамдық қоры, Білім беруді тұрақты дамыту қоры және «Назарбаев Зияткерлік мектептері» ДББҰ қолдауымен жүзеге асырылуда және ауыл мектептерінің білім беру әлеуетін арттыруға бағытталған.
