Мектеп басшыларының кадрлық резервін жасақтау бойынша «Білім берудегі өзгерістің 1000 көшбасшысы» жобасының қатысушылары кәсіби деңгей бойынша оқуды сәтті аяқтады. Қазір олар қорытынды бағалау жұмыстарын әзірлеуде. Бағалау кезеңінен соң Министрлік жанындағы комиссиямен әңгімелесу жоспарланған.
Оқу барысында қатысушылар алған білімдерін тәжірибеде қолдануға мүмкіндік алды: тәжірибе мен үздік мектептерде апталық тағылымдамадан өтіп, арнайы ұйымдастырылған шеберлік сағаттарына қатысты. Шеберлік сағаттарына көпжылдық тәжірибесі бар мектеп директорлары және басшылық қызметке кіріскен жоба түлектері шақырылды.
Кездесу барысында спикерлер мектепті тиімді басқару тетіктерін, заманауи білім беру менеджментінің қағидаларын, сондай-ақ қауіпсіз әрі қолайлы оқу ортасын құрудың өзекті мәселелерін талқылай отырып, басшылықтың бастапқы қадамда кездесетін кедергілерді және олардың алдын алу бойынша тәжірибелерін бөлісті.
Айта кету керек, бағдарламаның барлық кезеңдерінен өткен үміткерлер конкурстық рәсімдерден өтпей-ақ бірінші басшы лауазымына тағайындалу құқығына ие болады. Педагогикалық шеберлік орталығы оқу бағдарламасынан кейін де қатысушыларға жүйелі қолдау көрсетеді.
