Жаңалықтар

«Өңірлік тренерлердің тыңдаушыларға курстан кейінгі әдістемелік қолдау көрсету механизмі» вебинары 

2020 жылы 26 тамызда Педагогикалық шеберлік орталығының ұйымдастыруымен  техникалық және кәсіптік білім беру ұйымдарының көшбасшы-педагогтеріне арналған «Өңірлік тренерлердің тыңдаушыларға курстан кейінгі әдістемелік қолдау көрсету механизмі» атты вебинар өткізілді. 
Вебинардың мақсаты ТжКБ жалпы білім беретін пәндері оқытушыларын жаңартылған орта білім беру мазмұны бағдарламаларын тәжірибесіне енгізуде курстан кейінгі әдістемелік қолдау көрсету механизмін анықтау болды. Вебинарға республикамыздың ТжКБ ұйымдарының 386 өңірлік тренері қатысты.
Вебинардың бірінші бөлімінде біліктілікті арттыру курстарынан өткен ТжКБ оқытушыларының жаңартылған білім беру мазмұнын іске асыру аясындағы қажеттіліктерін анықтау мақсатында жүргізілген сауалнама қорытындысы талданды. Тыңдаушылар өздерінің жаңартылған бағдарлама идеяларын енгізуде мықты тұстарымен қатар, тәжірибеге енгізуде қиындық тудыратын әлсіз тұстарын да көрсетті. Талдау негізінде өңірлік тренерлердің әдістемелік қолдау бағыттарын айқындады.
Вебинар барысында қатысушылар Чикаго университетінің профессоры Дж. Иганның «Тәжірибелі көмекші» моделімен танысты. 3 сатылы құрылымдалған бұл модель негізінде қатысушылар тыңдаушылардың оқыту тәжірибесіндегі қиындықтары мен өзекті проблемаларын талдау арқылы кәсіби даму аймағын, мақсат пен күтілетін нәтижені айқындап, бірлескен іс-әрекеттер жоспарын жасау қажеттігін қарастырды. Курстан кейінгі қолдаудың 7 нақты қадамдары өңірлік тренерлердің тәлімгер ретіндегі маңыздылығын айқындады.
Өңірлік тренерлер вебинардың практикалық бөлімінде курстан кейінгі қолдаудың бағыттары, яғни қажеттіліктерді анықтау, сабақты бірлесіп жоспарлау, сабақты бақылау, кері байланыс беру және этикалық талаптар бойынша өңірлік тренерлерге арналған жадынама әзірледі. Топтық өнім олардың әдістемелік жұмыстарының мазмұны мен тәжірибеде қалай жүзеге асырылу керектігі бойынша идеяларын ортаға салуға мүмкіндік берді. Көшбасшы-педагогтер өздерінің жетекші тренер ретіндегі рөлін жақсы түсінді және вебинар жұмыстарында белсенділік танытты.
Вебинар соңында жүргізілген онлайн-сауалнамада қатысушылар іс-шараның мазмұнының маңыздылығы мен қарастырылған ақпараттардың құндылығын атады. Қатысушылар әдістемелік қолдау жүргізуге дайын екендігін, сонымен қатар оларға осы бағытта тәлімгерлер тарапынан қолдаудың да қажеттігін атап өтті. Педагогикалық шеберлік орталығының өңірлік тренерлерді әдістемелік қолдау бағытында жүргізілетін вебинарлар топтамасы жаңа оқу жылында әлі де жалғасын табады.