«Назарбаев Зияткерлік мектептері» дербес ұйымында дарынды әрі табысты кәсіпқойлармен, мәдениет, ғылым және өнер қайраткерлерімен кездесулер өткізу игі дәстүрге айналды.
2021 жылдың 28 мамырында Педагогикалық шеберлік орталығы медицина ғылымдарының докторы, University Medical Center корпоративтік қорының Басқарма төрағасы, «Ұлттық ғылыми кардиохирургия орталығы» АҚ хирургия және ғылым жөніндегі директоры Пя Юрий Владимировичпен онлайн кездесу ұйымдастырды.
Аты әлемге әйгілі профессорды «Назарбаев Зияткерлік мектептері» ДББҰ Басқарма Төрайымы Күләш Ноғатайқызы Шәмшидинова жылы шыраймен қарсы алды.
Юрий Владимировичтің айтуынша, ұжымдағы жетістіктің кілті –командалық жұмыс, көшбасшылықты дұрыс бөлу және адамдарға көмектесуге деген ұмтылыс. Ол өзінің өмірдегі басты тәлімгерлері, айналадағы адамдарға сүйіспеншілікпен қарауға тәрбиелеген, мамандығы мұғалім – ата-анасы екенін айтып өтті.
Ғалым өзінің жетістігінің формуласы өз ісіне деген сүйіспеншілік, адалдық пен ашықтық деп есептейді. Ол «Жүрек Орталығы» қорының жұмысы, қайырымдылық, салауатты өмір салты және болашаққа үлкен жоспарлары туралы үлкен қуанышпен әңгімелеп берді.
Ұйымның 300-ден астам қызметкері дәрігердің тәжірибесі мен ғылыми әзірлемелері жайлы әңгімесін үлкен қызығушылықпен тыңдады. Дәрігер кездесуге қатысушыларға айтқан сөзінде салауатты өмір салтын ұстанудың үш кеңесімен бөлісті: уақытты дұрыс басқару, позитивке ұмтылу, оң және игі істердің себебін іздеу.
